ras mein Duba hua lahraata badan kya kahna

ras meñ Duubā huā lahrātā badan kyā kahnā

karvaTeñ letī huī sub.h-e-chaman kyā kahnā

nigah-e-nāz meñ ye pichhle pahar rañg-e-ḳhumār

niiñd meñ Duubī huī chandr-kiran kyā kahnā

bāġh-e-jannat pe ghaTā jaise baras ke khul jaa.e

ye suhānī tirī ḳhushbu-e-badan kyā kahnā

Thahrī Thahrī sī nigāhoñ meñ ye vahshat kī kiran

chauñke chauñke se ye āhū-e-ḳhutan kyā kahnā

ruup sañgīt ne dhārā hai badan kā ye rachāv

tujh pe lahlūt hai be-sāḳhta-pan kyā kahnā

jaise lahrā.e koī sho.ala-kamar kī ye lachak

sar-ba-sar ātish-e-sayyāl badan kyā kahnā

jis tarah jalva-e-firdos havāoñ se chhine

pairahan meñ tire rañgīnī-e-tan kyā kahnā

jalva-o-parde kā ye rang dam-e-nazzāra

jis tarah adh-khule ghūñghaT meñ dulhan kyā kahnā

dam-e-taqrīr khil uThte haiñ gulistāñ kyā kyā

yuuñ to ik ġhuncha-e-nauras hai dahan kyā kahnā

dil ke ā.īne meñ is tarah utartī hai nigāh

jaise paanī meñ lachak jaa.e kiran kyā kahnā

lahlahātā huā ye qad ye lahaktā joban

zulf so mahkī huī rātoñ kā ban kyā kahnā

tū mohabbat kā sitāra to javānī kā suhāg

husn lau detā hai lā'l-e-yaman kyā kahnā

terī āvāz saverā tirī bāteñ taḌkā

āñkheñ khul jaatī haiñ ejāz-e-suḳhan kyā kahnā

zulf-e-shab-gūñ kī chamak paikar-e-sīmīñ kī damak

dīp-mālā hai sar-e-gañg-o-jaman kyā kahnā

nīlgūñ shabnamī kapḌoñ meñ badan kī ye jot

jaise chhantī ho sitāroñ kī kiran kyā kahnā

ras mein Duba hua lahraata badan kya kahna

karwaTen leti hui subh-e-chaman kya kahna

nigah-e-naz mein ye pichhle pahar rang-e-KHumar

nind mein Dubi hui chandr-kiran kya kahna

bagh-e-jannat pe ghaTa jaise baras ke khul jae

ye suhani teri KHushbu-e-badan kya kahna

Thahri Thahri si nigahon mein ye wahshat ki kiran

chaunke chaunke se ye aahu-e-KHutan kya kahna

rup sangit ne dhaara hai badan ka ye rachaw

tujh pe lahlut hai be-saKHta-pan kya kahna

jaise lahrae koi shoala-kamar ki ye lachak

sar-ba-sar aatish-e-sayyal badan kya kahna

jis tarah jalwa-e-firdos hawaon se chhine

pairahan mein tere rangini-e-tan kya kahna

jalwa-o-parde ka ye rang dam-e-nazzara

jis tarah adh-khule ghunghaT mein dulhan kya kahna

dam-e-taqrir khil uThte hain gulistan kya kya

yun to ek ghuncha-e-nauras hai dahan kya kahna

dil ke aaine mein is tarah utarti hai nigah

jaise pani mein lachak jae kiran kya kahna

lahlahata hua ye qad ye lahakta joban

zulf so mahki hui raaton ka ban kya kahna

tu mohabbat ka sitara to jawani ka suhag

husn lau deta hai la'l-e-yaman kya kahna

teri aawaz sawera teri baaten taDka

aankhen khul jati hain ejaz-e-suKHan kya kahna

zulf-e-shab-gun ki chamak paikar-e-simin ki damak

dip-mala hai sar-e-gang-o-jaman kya kahna

nilgun shabnami kapDon mein badan ki ye jot

jaise chhanti ho sitaron ki kiran kya kahna