rashk-e-adu mein dekho jaan tak ganwa hi denge

rashk-e-adū meñ dekho jaañ tak gañvā hī deñge

lo jhuuT jānte ho ik din dikhā hī deñge

āvāz kī tarah se baiTheñge aaj ai jaañ

dekheñ to aap kyuuñ kar ham ko uThā hī deñge

uḌ jā.ūñgā jahāñ se āshiq kā rañg ho kar

naqsh-e-qadam nahīñ huuñ jis ko miTā hī deñge

ġhairoñ kī justujū kī muddat se aarzū hai

ye yaad vo nahīñ hai jis ko bhulā hī deñge

sho.ale nikal rahe haiñ har ustuḳhvāñ se apnī

sham.eñ ye vo nahīñ haiñ jis ko bujhā hī deñge

ḳhāmosh guftugū haiñ afsurda aarzū haiñ

vo dil nahīñ hamārā jis ko hañsā hī deñge

us ḳhaak tak pahuñch kar phirnā 'nasīm' mushkil

huuñ ashk-ūftāda kyuuñ kar uThā hī deñge

rashk-e-adu mein dekho jaan tak ganwa hi denge

lo jhuT jaante ho ek din dikha hi denge

aawaz ki tarah se baiThenge aaj ai jaan

dekhen to aap kyun kar hum ko uTha hi denge

uD jaunga jahan se aashiq ka rang ho kar

naqsh-e-qadam nahin hun jis ko miTa hi denge

ghairon ki justuju ki muddat se aarzu hai

ye yaad wo nahin hai jis ko bhula hi denge

shoale nikal rahe hain har ustuKHwan se apni

shamen ye wo nahin hain jis ko bujha hi denge

KHamosh guftugu hain afsurda aarzu hain

wo dil nahin hamara jis ko hansa hi denge

us KHak tak pahunch kar phirna 'nasim' mushkil

hun ashk-uftada kyun kar uTha hi denge