رشک فردوس ہے اس غنچہ دہن کی خوشبو

رشک فردوس ہے اس غنچہ دہن کی خوشبو

میری ہر سانس میں ہے اس کے بدن کی خوشبو

حال کہتے ہوئے اس کا مرے لب جلتے ہیں

ہے خیالوں میں مرے شعلہ بدن کی خوشبو

وہ پری وش نظر آ جائے تو آتی ہے مجھے

شوخئ داغ کی حسرت کے سخن کی خوشبو

میرے اشعار سے روشن ہے کلاسک کا چراغ

ہے تغزل میں مرے میر کے فن کی خوشبو

تجربہ ہے یہ غریب الوطنی کا یارو

بارہا ٹوٹ کے آتی ہے وطن کی خوشبو

دشمن فصل بہاراں ہے وہ تخریبی ہے

جس میں آتی نہ ہو تعمیر وطن کی خوشبو

غالبؔ و میرؔ ولیؔ حسرتؔ و مومنؔ کی طرح

سب کے شعروں میں ہے اس حسن کہن کی خوشبو

ہیں تیرے پھول سے الفاظ کی غزلیں آسیؔ

بزم میں دور سے آتی ہے سخن کی خوشبو