rashk-e-firdaus hai us ghuncha-dahan ki KHushbu

rashk-e-firdaus hai us ġhuncha-dahan kī ḳhushbū

merī har saañs meñ hai us ke badan kī ḳhushbū

haal kahte hue us kā mire lab jalte haiñ

hai ḳhayāloñ meñ mire sho.ala-badan kī ḳhushbū

vo parī-vash nazar aa jaa.e to aatī hai mujhe

shoḳhī-e-dāġh kī hasrat ke suḳhan kī ḳhushbū

mere ash.ār se raushan hai classic kā charāġh

hai taġhazzul meñ mire miir ke fan kī ḳhushbū

tajraba hai ye ġharīb-ul-vatanī kā yaaro

bārhā TuuT ke aatī hai vatan kī ḳhushbū

dushman-e-fasl-e-bahārāñ hai vo taḳhrībī hai

jis meñ aatī na ho ta.amīr-e-vatan kī ḳhushbū

'ġhālib'-o-'mīr' 'valī' 'hasrat'-o-'momin' kī tarah

sab ke sheroñ meñ hai us husn-e-kuhan kī ḳhushbū

haiñ tere phuul se alfāz kī ġhazleñ 'āsī'

bazm meñ duur se aatī hai suḳhan kī ḳhushbū

rashk-e-firdaus hai us ghuncha-dahan ki KHushbu

meri har sans mein hai us ke badan ki KHushbu

haal kahte hue us ka mere lab jalte hain

hai KHayalon mein mere shoala-badan ki KHushbu

wo pari-wash nazar aa jae to aati hai mujhe

shoKHi-e-dagh ki hasrat ke suKHan ki KHushbu

mere ashaar se raushan hai classic ka charagh

hai taghazzul mein mere mir ke fan ki KHushbu

tajraba hai ye gharib-ul-watani ka yaro

barha TuT ke aati hai watan ki KHushbu

dushman-e-fasl-e-bahaaran hai wo taKHribi hai

jis mein aati na ho tamir-e-watan ki KHushbu

'ghaalib'-o-'mir' 'wali' 'hasrat'-o-'momin' ki tarah

sab ke sheron mein hai us husn-e-kuhan ki KHushbu

hain tere phul se alfaz ki ghazlen 'asi'

bazm mein dur se aati hai suKHan ki KHushbu