رسم دنیا مجھ کو بھی آخر نبھانا آ گیا

رسم دنیا مجھ کو بھی آخر نبھانا آ گیا

اپنے محسوسات کو دل میں دبانا آ گیا

بے زبانی نے مری برسوں رلایا خوں مجھے

لب کشا ہوں جب سے ٹھوکر میں زمانہ آ گیا

بن تمھارے زندگی تھی جیسے اک کوہ گراں

تم ملے ہمدم تو جینے کا بہانہ آ گیا

ہاں فقط رنج و الم سے آشنائی تھی مری

تم جو آئے ان لبوں کو مسکرانا آ گیا

ایک دن میری طرح تڑپو گے تم بھی دیکھنا

گر کہیں دل کو مرے تم کو بھلانا آ گیا

چار سو روتی بلکتی اور تڑپتی زندگی

میں بھلا کیسے کہوں موسم سہانہ آ گیا

اک نہ اک دن میں بھی شاماؔ مسکراؤں گی ضرور

نقش ماضی گر مجھے دل سے بھلانا آ گیا