rasm-e-duniya mujhko bhi aaKHir nibhana aa gaya

rasm-e-duniyā mujh ko bhī āḳhir nibhānā aa gayā

apne mahsūsāt ko dil meñ dabānā aa gayā

be-zabānī ne mirī barsoñ rulāyā ḳhuuñ mujhe

lab-kushā huuñ jab se Thokar meñ zamāna aa gayā

bin tumhāre zindagī thī jaise ik koh-e-girāñ

tum mile hamdam to jiine kā bahāna aa gayā

haañ faqat ranj-o-alam se āshnā.ī thī mirī

tum jo aa.e in laboñ ko muskurānā aa gayā

ek din merī tarah taḌpoge tum bhī dekhnā

gar kahīñ dil ko mire tum ko bhulānā aa gayā

chār-sū rotī bilaktī aur taḌaptī zindagī

maiñ bhalā kaise kahūñ mausam suhāna aa gayā

ik na ik din maiñ bhī 'shāmā' muskurā.ūñgī zarūr

naqsh-e-māzī gar mujhe dil se bhulānā aa gayā

rasm-e-duniya mujh ko bhi aaKHir nibhana aa gaya

apne mahsusat ko dil mein dabana aa gaya

be-zabani ne meri barson rulaya KHun mujhe

lab-kusha hun jab se Thokar mein zamana aa gaya

bin tumhaare zindagi thi jaise ek koh-e-giran

tum mile hamdam to jine ka bahana aa gaya

han faqat ranj-o-alam se aashnai thi meri

tum jo aae in labon ko muskurana aa gaya

ek din meri tarah taDpoge tum bhi dekhna

gar kahin dil ko mere tum ko bhulana aa gaya

chaar-su roti bilakti aur taDapti zindagi

main bhala kaise kahun mausam suhana aa gaya

ek na ek din main bhi 'shama' muskuraungi zarur

naqsh-e-mazi gar mujhe dil se bhulana aa gaya