rasta bhaTak na jaen tere naqsh-e-pa se hum

rasta bhaTak na jaa.eñ tire naqsh-e-pā se ham

ham se judā ḳhudā ho judā hoñ ḳhudā se ham

dast-e-duā buland haiñ sū-e-falak magar

vāqif nahīñ haiñ aaj bhī harf-e-duā se ham

ham haiñ marīz-e-ishq hameñ yaar chāhiye

achchhe na ho sakeñge tabībo davā se ham

jhuk kar salām karte haiñ pardā-nashīn ko

karte nahīñ kalām kisī be-ridā se ham

sah-roz bhūk-pyās meñ sābit qadam rahe

ho kar shahīd haare na jaur-o-jafā se ham

gūñdhā gayā turāb ko ātish ke chaak par

aa.e haqīqī shakl meñ āb-o-havā se ham

chāroñ taraf se ghere hue hai yazīdiyat

tanhā khaḌe haiñ ran meñ faqat karbalā se ham

nazreñ milā na pā.egī ham se koī ḳhushī

itnā qarīb ho ga.e āh-o-bukā se ham

saaqī se pūchiyegā hamārī haqīqateñ

dikhte haiñ sirf haiñ nahīñ sūfī-numā se ham

bachpan se paḌh rahe haiñ 'anīs'-o-'dabīr' ko

'mehvar' suḳhan-shanās rahe ibtidā se ham

rasta bhaTak na jaen tere naqsh-e-pa se hum

hum se juda KHuda ho juda hon KHuda se hum

dast-e-dua buland hain su-e-falak magar

waqif nahin hain aaj bhi harf-e-dua se hum

hum hain mariz-e-ishq hamein yar chahiye

achchhe na ho sakenge tabibo dawa se hum

jhuk kar salam karte hain parda-nashin ko

karte nahin kalam kisi be-rida se hum

sah-roz bhuk-pyas mein sabit qadam rahe

ho kar shahid haare na jaur-o-jafa se hum

gundha gaya turab ko aatish ke chaak par

aae haqiqi shakl mein aab-o-hawa se hum

chaaron taraf se ghere hue hai yazidiyat

tanha khaDe hain ran mein faqat karbala se hum

nazren mila na paegi hum se koi KHushi

itna qarib ho gae aah-o-buka se hum

saqi se puchiyega hamari haqiqaten

dikhte hain sirf hain nahin sufi-numa se hum

bachpan se paDh rahe hain 'anis'-o-'dabir' ko

'mehwar' suKHan-shanas rahe ibtida se hum