raste mein sham ho gai qissa tamam ho chuka

raste meñ shaam ho ga.ī qissa tamām ho chukā

jo kuchh bhī thā ai zindagī vo tere naam ho chukā

kab kī guzar ga.ī vo shab jis meñ kisī kā nuur thā

kab kī galī meñ dhuup hai jiinā harām ho chukā

phirte raheñ nagar nagar kūcha-ba-kūcha dar-ba-dar

apne ḳhiyām jal chuke apnā salām ho chukā

raat meñ baaqī kuchh nahīñ niiñd meñ baaqī kuchh nahīñ

apnā har ek ḳhvāb to nazr-e-avām ho chukā

us ke laboñ kī guftugū karte rahe subū subū

ya.anī suḳhan hue tamām ya.anī kalām ho chukā

ishq gar aisā ishq hai ā.ankhoñ se bahne do lahū

ziist gar aisī ziist hai apnā to kaam ho chukā

raste tamām ho ga.e us kī galī ke ās-pās

ya.anī ḳhirām ho chukā ya.anī qayām ho chukā

raste mein sham ho gai qissa tamam ho chuka

jo kuchh bhi tha ai zindagi wo tere nam ho chuka

kab ki guzar gai wo shab jis mein kisi ka nur tha

kab ki gali mein dhup hai jina haram ho chuka

phirte rahen nagar nagar kucha-ba-kucha dar-ba-dar

apne KHiyam jal chuke apna salam ho chuka

raat mein baqi kuchh nahin nind mein baqi kuchh nahin

apna har ek KHwab to nazr-e-awam ho chuka

us ke labon ki guftugu karte rahe subu subu

yani suKHan hue tamam yani kalam ho chuka

ishq gar aisa ishq hai aaankhon se bahne do lahu

zist gar aisi zist hai apna to kaam ho chuka

raste tamam ho gae us ki gali ke aas-pas

yani KHiram ho chuka yani qayam ho chuka