raste mein to KHatraat ki sun-gun bhi bahut hai

raste meñ to ḳhatrāt kī sun-gun bhī bahut hai

manzil pe pahuñchne kī hameñ dhun bhī bahut hai

har shahr meñ taaza hai to bas zaḳhm-e-ta.assub

kuchh lazzat-e-nāhaq kā ta.āvun bhī bahut hai

kuchh hāthoñ se kuchh mātoñ se kālak nahīñ jaatī

har chand ki bāzār meñ sābun bhī bahut hai

vo haath tahaffuz kī alāmat jise kahiye

mahsūs ye hotā hai vahī sun bhī bahut hai

ik jism ke mānind haiñ ham log kahīñ hoñ

Thokar se ukhaḌtā hai to nāḳhun bhī bahut hai

ham sher kahā karte haiñ vijdān ke bal par

kuchh logoñ ko zo.am-e-fa.ilātun bhī bahut hai

raste mein to KHatraat ki sun-gun bhi bahut hai

manzil pe pahunchne ki hamein dhun bhi bahut hai

har shahr mein taza hai to bas zaKHm-e-tassub

kuchh lazzat-e-nahaq ka taawun bhi bahut hai

kuchh hathon se kuchh maton se kalak nahin jati

har chand ki bazar mein sabun bhi bahut hai

wo hath tahaffuz ki alamat jise kahiye

mahsus ye hota hai wahi sun bhi bahut hai

ek jism ke manind hain hum log kahin hon

Thokar se ukhaDta hai to naKHun bhi bahut hai

hum sher kaha karte hain wijdan ke bal par

kuchh logon ko zoam-e-failatun bhi bahut hai