raunaq-e-bazm-e-suKHan apni jagah

raunaq-e-bazm-e-suḳhan apnī jagah

ilm-o-dānish fikr-o-fan apnī jagah

be-niyāz in sab se rahte haiñ shahīd

maqbare ġhusl-o-kafan apnī jagah

baat mandir kī ho yā masjid kī ho

jazba-e-hubb-e-vatan apnī jagah

bā.is-e-taskīn ḳhāmoshī-e-dasht

aur shor-e-anjuman apnī jagah

jānte haiñ haiñ kamīñ meñ un ke sher

mast haiñ phir bhī hiran apnī jagah

vaise to har chiiz meñ Thahrāo hai

bas nahīñ rahtā hai man apnī jagah

ahl-e-haq rahte haiñ ab bhī sar-ba-kaf

aur haiñ dār-o-rasan apnī jagah

bad-gumānī un kī mujh se ab bhī hai

aur merā husn-e-zan apnī jagah

hai havas 'abbād' har-sū jalva-gar

aur mohabbat kā chalan apnī jagah

raunaq-e-bazm-e-suKHan apni jagah

ilm-o-danish fikr-o-fan apni jagah

be-niyaz in sab se rahte hain shahid

maqbare ghusl-o-kafan apni jagah

baat mandir ki ho ya masjid ki ho

jazba-e-hubb-e-watan apni jagah

bais-e-taskin KHamoshi-e-dasht

aur shor-e-anjuman apni jagah

jaante hain hain kamin mein un ke sher

mast hain phir bhi hiran apni jagah

waise to har chiz mein Thahrao hai

bas nahin rahta hai man apni jagah

ahl-e-haq rahte hain ab bhi sar-ba-kaf

aur hain dar-o-rasan apni jagah

bad-gumani un ki mujh se ab bhi hai

aur mera husn-e-zan apni jagah

hai hawas 'abbaad' har-su jalwa-gar

aur mohabbat ka chalan apni jagah