raunaq-e-kashana-e-dil be-ruKHi ne chhin li

raunaq-e-kāshāna-e-dil be-ruḳhī ne chhīn lī

zindagī zinda-dilī afsurdagī ne chhīn lī

rāt-din rahtā huuñ maiñ shāna-kash-e-zulf-e-suḳhan

fikr-e-duniyā fikr-e-‘uqbā shā'irī ne chhīn lī

apnī peshānī pe jab qashqa lagāyā shaiḳh ne

sab musalmānī butoñ kī bandagī ne chhīn lī

sādgī bachpan kī thī ik tohfa-e-fitrat magar

sādgī 'umr-e-ravāñ kī puḳhtagī ne chhīn lī

daulat-o-iqbāl kā ab ho gayā sūraj ġhurūb

jo chamak thī zindagī meñ tīrgī ne chhīn lī

dekhtā hai kaun 'nāzir' aaj me’yār-e-ġhazal

ḳhūbī-e-fan bhī gale kī naġhmagī ne chhīn lī

raunaq-e-kashana-e-dil be-ruKHi ne chhin li

zindagi zinda-dili afsurdagi ne chhin li

raat-din rahta hun main shana-kash-e-zulf-e-suKHan

fikr-e-duniya fikr-e-‘uqba sha'iri ne chhin li

apni peshani pe jab qashqa lagaya shaiKH ne

sab musalmani buton ki bandagi ne chhin li

sadgi bachpan ki thi ek tohfa-e-fitrat magar

sadgi 'umr-e-rawan ki puKHtagi ne chhin li

daulat-o-iqbaal ka ab ho gaya suraj ghurub

jo chamak thi zindagi mein tirgi ne chhin li

dekhta hai kaun 'nazir' aaj me’yar-e-ghazal

KHubi-e-fan bhi gale ki naghmagi ne chhin li