رونق ضو فشاں سے پھول گرے

رونق ضو فشاں سے پھول گرے

یا ہمارے گماں سے پھول گرے

درد نے پھر سے دل میں کروٹ لی

آج پھر آسماں سے پھول گرے

پھر تری یاد نے کیا جادو

خواب میں کہکشاں سے پھول گرے

پھر تصور میں وہ خیال آیا

کاوش رائیگاں سے پھول گرے

دامن دل یہ بھر گیا کیسے

کیا خبر ہے کہاں سے پھول گرے

پھول ہی پھول ہو گئی دنیا

یوں ترے جسم و جاں سے پھول گرے

پھر مہکنے لگی ہے جان غزل

پھر ہماری زباں سے پھول گرے

میں کہاں تھا کہاں نہیں اجملؔ

جب زمان و مکاں سے پھول گرے