raunaq tere kuche ki baDhane chale aae

raunaq tire kūche kī baḌhāne chale aa.e

arbāb-e-junūñ hashr uThāne chale aa.e

ab aur numā.indagī-e-shab na karo tum

ham parcham-e-ḳhurshīd uḌāne chale aa.e

jab garmī-e-shabnam se badan jalne lagā hai

ham aag ke dariyā meñ nahāne chale aa.e

jo log mirā naqsh-e-qadam chuum rahe the

ab vo bhī mujhe raah dikhāne chale aa.e

jin se mujhe phūloñ kī thī ummīd vahī log

kāñTe mirī rāhoñ meñ bichhāne chale aa.e

ye gardish-e-hālāt kī hai zarra-navāzī

vo ḳhud hī mujhe aaj manāne chale aa.e

kyā ye bhī koī anjuman-e-māh-vashāñ hai

'rāhī' bhī ġhazal apnī sunāne chale aa.e

raunaq tere kuche ki baDhane chale aae

arbab-e-junun hashr uThane chale aae

ab aur numaindagi-e-shab na karo tum

hum parcham-e-KHurshid uDane chale aae

jab garmi-e-shabnam se badan jalne laga hai

hum aag ke dariya mein nahane chale aae

jo log mera naqsh-e-qadam chum rahe the

ab wo bhi mujhe rah dikhane chale aae

jin se mujhe phulon ki thi ummid wahi log

kanTe meri rahon mein bichhane chale aae

ye gardish-e-haalat ki hai zarra-nawazi

wo KHud hi mujhe aaj manane chale aae

kya ye bhi koi anjuman-e-mah-washan hai

'rahi' bhi ghazal apni sunane chale aae