raunaq tumhaare dam se hai lail-o-nahaar ki

raunaq tumhāre dam se hai lail-o-nahār kī

tum aabrū ho āmad-e-fasl-e-bahār kī

lafzoñ meñ ham bayāñ nahīñ kar pā.eñge kabhī

kaise sahar huī hai shab-e-intizār kī

aa jā ki tere ahd-e-vafā kā bharam rahe

rah jaa.e aabrū bhī mire e'tibār kī

har moḌ par likhā hai mirā haal jān-e-man

kyā kaifiyat batā.ūñ dil-e-be-qarār kī

ham tum se duur rah ke tumhāre haiñ aaj bhī

ham ne to aise riit nibhā.ī hai pyaar kī

ahl-e-chaman kī aañkh se aañsū nikal paḌe

mausam ne ruḳhsatī jo sunā.ī bahār kī

jo sab pe rahm karte haiñ is kā.enāt meñ

rahmat unhīñ pe hotī hai parvardigār kī

un ke baġhair dil kā ye aalam hai ab 'suman'

bujhtī huī huuñ sham.a maiñ jaise mazār kī

raunaq tumhaare dam se hai lail-o-nahaar ki

tum aabru ho aamad-e-fasl-e-bahaar ki

lafzon mein hum bayan nahin kar paenge kabhi

kaise sahar hui hai shab-e-intizar ki

aa ja ki tere ahd-e-wafa ka bharam rahe

rah jae aabru bhi mere e'tibar ki

har moD par likha hai mera haal jaan-e-man

kya kaifiyat bataun dil-e-be-qarar ki

hum tum se dur rah ke tumhaare hain aaj bhi

hum ne to aise rit nibhai hai pyar ki

ahl-e-chaman ki aankh se aansu nikal paDe

mausam ne ruKHsati jo sunai bahaar ki

jo sab pe rahm karte hain is kaenat mein

rahmat unhin pe hoti hai parwardigar ki

un ke baghair dil ka ye aalam hai ab 'suman'

bujhti hui hun shama main jaise mazar ki