raunaqon par hain bahaaren tere diwanon se

raunaqoñ par haiñ bahāreñ tire dīvānoñ se

phuul hañste hue nikle haiñ nihāñ-ḳhānoñ se

laakh armānoñ ke ujḌe hue ghar haiñ dil meñ

ye vo bastī hai ki ābād hai vīrānoñ se

lāla-zāroñ meñ jab aatī haiñ bahāreñ saaqī

aag lag jaatī hai zālim tire paimānoñ se

ab koī dair meñ ulfat kā talabgār nahīñ

uTh ga.ī rasm-e-vafā haa.e sanam-ḳhānoñ se

paas aate ga.e jis darja bayābānoñ ke

duur hote ga.e ham aur bayābānoñ se

ab ke hamrāh guzāreñge junūñ kā mausam

dāmanoñ kī ye tamannā hai garebānoñ se

is zamāne ke vo mai-nosh vo badmast haiñ ham

pārsā ho ke nikalte haiñ jo mai-ḳhānoñ se

haa.e kyā chiiz hai kaifiyat-e-soz-e-ulfat

koī pūchhe ye tire soḳhta-sāmānoñ se

phir bahār aa.ī junūñ-ḳhez havā.eñ le kar

phir bulāve mujhe aate haiñ bayābānoñ se

ḳhaak kis mast-e-mohabbat kī hai saaqī in meñ

ki mujhe bū-e-vafā aatī hai paimānoñ se

ġhair kī maut pe vo rote haiñ aur ham 'afsar'

zahr piite haiñ chhalakte hue paimānoñ se

raunaqon par hain bahaaren tere diwanon se

phul hanste hue nikle hain nihan-KHanon se

lakh armanon ke ujDe hue ghar hain dil mein

ye wo basti hai ki aabaad hai viranon se

lala-zaron mein jab aati hain bahaaren saqi

aag lag jati hai zalim tere paimanon se

ab koi dair mein ulfat ka talabgar nahin

uTh gai rasm-e-wafa hae sanam-KHanon se

pas aate gae jis darja bayabanon ke

dur hote gae hum aur bayabanon se

ab ke hamrah guzarenge junun ka mausam

damanon ki ye tamanna hai garebanon se

is zamane ke wo mai-nosh wo badmast hain hum

parsa ho ke nikalte hain jo mai-KHanon se

hae kya chiz hai kaifiyat-e-soz-e-ulfat

koi puchhe ye tere soKHta-samanon se

phir bahaar aai junun-KHez hawaen le kar

phir bulawe mujhe aate hain bayabanon se

KHak kis mast-e-mohabbat ki hai saqi in mein

ki mujhe bu-e-wafa aati hai paimanon se

ghair ki maut pe wo rote hain aur hum 'afsar'

zahr pite hain chhalakte hue paimanon se