raushan hai bazm-e-shoala-ruKHan dekhte chalen

raushan hai bazm-e-sho.ala-ruḳhāñ dekhte chaleñ

is meñ vo ek nūr-e-jahāñ dekhte chaleñ

vā ho rahī hai mai-kada-e-nīm-shab kī aañkh

añgḌā.ī le rahā hai jahāñ dekhte chaleñ

sargoshiyoñ kī raat hai ruḳhsār o lab kī raat

ab ho rahī hai raat javāñ dekhte chaleñ

dil meñ utar ke sair-e-dil-e-rah-ravāñ kareñ

aahoñ meñ Dhal ke zabt-e-fuġhāñ dekhte chaleñ

kaise haiñ ḳhānqāh meñ arbāb-e-ḳhānqāh

kis haal meñ hai pīr-e-muġhāñ dekhte chaleñ

maazī kī yādgār sahī yād-e-dil to hai

tarz-e-nashāt-e-nauha-garāñ dekhte chaleñ

sab vasvase haiñ gard-e-rah-e-kārvāñ ke saath

aage hai mish.aloñ kā dhuāñ dekhte chaleñ

āñchal se uḌ rahe haiñ fazāoñ meñ duur duur

shāyad vahī ho jān-e-butāñ dekhte chaleñ

aa hī ga.e haiñ raqs-gah-e-gul-ruḳhāñ meñ ham

kuchh rañg-o-bū kā sail-e-ravāñ dekhte chaleñ

raushan hai bazm-e-shoala-ruKHan dekhte chalen

is mein wo ek nur-e-jahan dekhte chalen

wa ho rahi hai mai-kada-e-nim-shab ki aankh

angDai le raha hai jahan dekhte chalen

sargoshiyon ki raat hai ruKHsar o lab ki raat

ab ho rahi hai raat jawan dekhte chalen

dil mein utar ke sair-e-dil-e-rah-rawan karen

aahon mein Dhal ke zabt-e-fughan dekhte chalen

kaise hain KHanqah mein arbab-e-KHanqah

kis haal mein hai pir-e-mughan dekhte chalen

mazi ki yaadgar sahi yaad-e-dil to hai

tarz-e-nashat-e-nauha-garan dekhte chalen

sab waswase hain gard-e-rah-e-karwan ke sath

aage hai mishalon ka dhuan dekhte chalen

aanchal se uD rahe hain fazaon mein dur dur

shayad wahi ho jaan-e-butan dekhte chalen

aa hi gae hain raqs-gah-e-gul-ruKHan mein hum

kuchh rang-o-bu ka sail-e-rawan dekhte chalen