raushan hai faza shams koi hai na qamar hai

raushan hai fazā shams koī hai na qamar hai

shā.ir huuñ mujhe arsh-e-muallā kī ḳhabar hai

dariyā meñ haiñ girdāb kināre pe bagūle

ārām kī sūrat na idhar hai na udhar hai

patte kī khaḌak se bhī laraztā hai mirā dil

saa.e se bhī ḳhatra mujhe daurān-e-safar hai

ik mauj bhī rakhtī hai kināre kī tamannā

āvāra jo phirtā huuñ ye merā hī jigar hai

ik tā.ir-e-mahsūr asīrī kā muḳhālif

uḌ saktā hai baazū meñ agar ek bhī par hai

maujoñ ko pata kyā hai samundar ko ḳhabar kyā

kis abr kī shoḳhī hai sadaf meñ jo guhar hai

kyā ashk kisī TūTte taare pe bahā.ūñ

ḳhud apnā hī anjām 'falak' pesh-e-nazar hai

raushan hai faza shams koi hai na qamar hai

shair hun mujhe arsh-e-mualla ki KHabar hai

dariya mein hain girdab kinare pe bagule

aaram ki surat na idhar hai na udhar hai

patte ki khaDak se bhi larazta hai mera dil

sae se bhi KHatra mujhe dauran-e-safar hai

ek mauj bhi rakhti hai kinare ki tamanna

aawara jo phirta hun ye mera hi jigar hai

ek tair-e-mahsur asiri ka muKHalif

uD sakta hai bazu mein agar ek bhi par hai

maujon ko pata kya hai samundar ko KHabar kya

kis abr ki shoKHi hai sadaf mein jo guhar hai

kya ashk kisi TuTte tare pe bahaun

KHud apna hi anjam 'falak' pesh-e-nazar hai