raushni ban ke andhere pe asar humne kiya

raushnī ban ke añdhere pe asar ham ne kiyā

dasht-e-tanhā.ī se kyā ḳhuub guzar ham ne kiyā

bandish-e-hijr ko toḌā nahīñ tū ne aa kar

yaad kyā tujh ko nahīñ shaam o sahar ham ne kiyā

ik bayābāñ bhī milā muntazir-e-nūr-e-azal

dil kī vīrānī ko jab pesh-e-nazar ham ne kiyā

aur kuchh ho na sakā sūrat-e-darmāñ lekin

apnā dāman to sar-e-dīda-e-tar ham ne kiyā

dard ke maare hue log the ḳhvāboñ ke qarīb

kaise nādīda zamānoñ kā safar ham ne kiyā

ham ne dekhā hai vahāñ phir bhī ujālā 'rāshid'

saath rahte hue sab ke jahāñ ghar ham ne kiyā

raushni ban ke andhere pe asar hum ne kiya

dasht-e-tanhai se kya KHub guzar hum ne kiya

bandish-e-hijr ko toDa nahin tu ne aa kar

yaad kya tujh ko nahin sham o sahar hum ne kiya

ek bayaban bhi mila muntazir-e-nur-e-azal

dil ki virani ko jab pesh-e-nazar hum ne kiya

aur kuchh ho na saka surat-e-darman lekin

apna daman to sar-e-dida-e-tar hum ne kiya

dard ke mare hue log the KHwabon ke qarib

kaise nadida zamanon ka safar hum ne kiya

hum ne dekha hai wahan phir bhi ujala 'rashid'

sath rahte hue sab ke jahan ghar hum ne kiya