raushni chaho to mehr-o-mah-o-aKHtar socho

raushnī chāho to mehr-o-mah-o-aḳhtar socho

ek qatre kī talab ho to samundar socho

kaise kī jaa.e rafū amn kī chādar socho

sochne vaalo zarā socho mukarrar socho

jis kā saaya hai tabāhī kī alāmat ai dost

us parinde ke katar pāoge kyā par socho

sīm-o-zar ke liye īmān luTāne vaalo

saath kyā le ke gayā apne sikandar socho

kaise duniyā ko mayassar hoñ uḳhuvvat ke samar

naḳhl ulfat kā ho kis tarah tanāvar socho

jis se aatī thī ḳhulūs aur vafā kī ḳhushbū

kaise pāmāl huā hai vo gul-e-tar socho

apne aḳhlāq se maġhlūb karo dushman ko

tiir socho na tabar socho na ḳhanjar socho

jis ne har gaam pe duniyā ko masarrat dī hai

aaj kyūñkar hai shikan us kī jabīñ par socho

jis kī peshānī pe manzil kā pata likkhā hai

Thokareñ kis liye khātā hai vo patthar socho

apnī ġhazloñ kā baḌhāne ke liye husn 'shafī.a'

fikr pākīza rakho lafz munavvar socho

raushni chaho to mehr-o-mah-o-aKHtar socho

ek qatre ki talab ho to samundar socho

kaise ki jae rafu amn ki chadar socho

sochne walo zara socho mukarrar socho

jis ka saya hai tabahi ki alamat ai dost

us parinde ke katar paoge kya par socho

sim-o-zar ke liye iman luTane walo

sath kya le ke gaya apne sikandar socho

kaise duniya ko mayassar hon uKHuwwat ke samar

naKHl ulfat ka ho kis tarah tanawar socho

jis se aati thi KHulus aur wafa ki KHushbu

kaise pamal hua hai wo gul-e-tar socho

apne aKHlaq se maghlub karo dushman ko

tir socho na tabar socho na KHanjar socho

jis ne har gam pe duniya ko masarrat di hai

aaj kyunkar hai shikan us ki jabin par socho

jis ki peshani pe manzil ka pata likkha hai

Thokaren kis liye khata hai wo patthar socho

apni ghazlon ka baDhane ke liye husn 'shafia'

fikr pakiza rakho lafz munawwar socho