روشنی گم ہونے کے اسباب ہیں

روشنی گم ہونے کے اسباب ہیں

تیرگی کے ہر طرف سیلاب ہیں

زیر دریا گوہر نایاب ہیں

ہم خس و خاشاک سطح آب ہیں

تیرنے والے یہاں غرقاب ہیں

تیری آنکھیں بھی عجب تالاب ہیں

جس کی قسمت میں رہا تنہا سفر

آخر شب ہم وہی مہتاب ہیں

مختلف تو ہیں مگر دانشورو

ہم جنوں والوں کے بھی آداب ہیں

بعد شب جن کی قدم بوسی کرے

وہ چراغ معتبر نایاب ہیں

پانیوں کا قحط ہے امسال بھی

جسم کے دریا سبھی پایاب ہیں

خشک موسم کی ہوائیں کیا ہوئیں

سارے جنگل سبز ہیں شاداب ہیں

موج اندر موج طوفاں درد کے

یم بہ یم افلاس کے گرداب ہیں

طائرو اترو مری وادی میں بھی

دشت ہیں کہسار ہیں تالاب ہیں

راہ میں آنکھیں بچھاتے ہیں جو شادؔ

وہ محبی ہیں مرے احباب ہیں