raushni gum hone ke asbab hain

raushnī gum hone ke asbāb haiñ

tīrgī ke har taraf sailāb haiñ

zer-e-dariyā gauhar-e-nāyāb haiñ

ham ḳhas-o-ḳhāshāk-e-sat.h-e-āb haiñ

tairne vaale yahāñ ġharqāb haiñ

terī āñkheñ bhī ajab tālāb haiñ

jis kī qismat meñ rahā tanhā safar

āḳhir-e-shab ham vahī mahtāb haiñ

muḳhtalif to haiñ magar dānishvaro

ham junūñ vāloñ ke bhī ādāb haiñ

bād-e-shab jin kī qadam-bosī kare

vo charāġh-e-mo'atabar nāyāb haiñ

pāniyoñ kā qaht hai imsāl bhī

jism ke dariyā sabhī pāyāb haiñ

ḳhushk mausam kī havā.eñ kyā huiiñ

saare jangal sabz haiñ shādāb haiñ

mauj-andar-mauj tūfāñ dard ke

yam-ba-yam iflās ke girdāb haiñ

tā.iro utro mirī vaadī meñ bhī

dasht haiñ kohsār haiñ tālāb haiñ

raah meñ āñkheñ bichhāte haiñ jo 'shād'

vo muhibbī haiñ mire ahbāb haiñ

raushni gum hone ke asbab hain

tirgi ke har taraf sailab hain

zer-e-dariya gauhar-e-nayab hain

hum KHas-o-KHashak-e-sath-e-ab hain

tairne wale yahan gharqab hain

teri aankhen bhi ajab talab hain

jis ki qismat mein raha tanha safar

aaKHir-e-shab hum wahi mahtab hain

muKHtalif to hain magar danishwaro

hum junun walon ke bhi aadab hain

baad-e-shab jin ki qadam-bosi kare

wo charagh-e-mo'atabar nayab hain

paniyon ka qaht hai imsal bhi

jism ke dariya sabhi payab hain

KHushk mausam ki hawaen kya huin

sare jangal sabz hain shadab hain

mauj-andar-mauj tufan dard ke

yam-ba-yam iflas ke girdab hain

tairo utro meri wadi mein bhi

dasht hain kohsar hain talab hain

rah mein aankhen bichhate hain jo 'shad'

wo muhibbi hain mere ahbab hain