raushni ke liye har pal jo hawa deta hai

raushnī ke liye har pal jo havā detā hai

yaad rakhnā vahī dīpak bhī bujhā detā hai

soch kar ye bhī qarīb aaya nahīñ maiñ tere

ḳhvāb nazdīkī kā duurī bhī baḌhā detā hai

pyaar karnā to magar us pe fidā mat honā

kyūñki dīpak hī patange ko miTā detā hai

pūchhtā huuñ jo maiñ anjām-e-mohabbat us se

aañkh se pyaar kā motī vo girā detā hai

yaad rakkhūñ to bhalā kaise us insān ko maiñ

din badalte hī jo ehsān bhulā detā hai

aise beTe pe bhalā kyā hī koī naaz kare

baap ke sar kī jo dastār girā detā hai

ye vo yug hai jahāñ nāvik ko batā kar doshī

naav ko paanī meñ tūfān Dubā detā hai

raushni ke liye har pal jo hawa deta hai

yaad rakhna wahi dipak bhi bujha deta hai

soch kar ye bhi qarib aaya nahin main tere

KHwab nazdiki ka duri bhi baDha deta hai

pyar karna to magar us pe fida mat hona

kyunki dipak hi patange ko miTa deta hai

puchhta hun jo main anjam-e-mohabbat us se

aankh se pyar ka moti wo gira deta hai

yaad rakkhun to bhala kaise us insan ko main

din badalte hi jo ehsan bhula deta hai

aise beTe pe bhala kya hi koi naz kare

bap ke sar ki jo dastar gira deta hai

ye wo yug hai jahan nawik ko bata kar doshi

naw ko pani mein tufan Duba deta hai