raushni ke na the aasar band kamre mein

raushnī ke na the āsār band kamre meñ

vo to lau de uThā kirdār band kamre meñ

hai guzar apnā hī mushkil to phir ta.ajjub hai

kis tarah aa gayā bāzār band kamre meñ

sher jitne kahe ḳhārij kiye sivā us se

sirf purzoñ kā hai ambār band kamre meñ

chāñd tāroñ se alag ek aur duniyā hai

bāñchtā thā koī aḳhbār band kamre meñ

tajraba ḳhuub hai is par amal bhī karnā hai

rahnā hai ḳhud se hī hushyār band kamre meñ

joḌ kar rakhtā thā duniyā se jo vo hī ehsās

ab paḌā rahtā hai bīmār band kamre meñ

sach agar jhuuT ko taslīm kar bhī luuñ to anā

ruuTh kar kartī hai takrār band kamre meñ

raushni ke na the aasar band kamre mein

wo to lau de uTha kirdar band kamre mein

hai guzar apna hi mushkil to phir tajjub hai

kis tarah aa gaya bazar band kamre mein

sher jitne kahe KHarij kiye siwa us se

sirf purzon ka hai ambar band kamre mein

chand taron se alag ek aur duniya hai

banchta tha koi aKHbar band kamre mein

tajraba KHub hai is par amal bhi karna hai

rahna hai KHud se hi hushyar band kamre mein

joD kar rakhta tha duniya se jo wo hi ehsas

ab paDa rahta hai bimar band kamre mein

sach agar jhuT ko taslim kar bhi lun to ana

ruTh kar karti hai takrar band kamre mein