raushni ko tirgi ka qahr ban kar le gaya

raushnī ko tīrgī kā qahr ban kar le gayā

aañkh meñ mahfūz the jitne bhī manzar le gayā

ajnabī sā lag rahā huuñ aaj apne aap ko

aa.ine ke sāmne maiñ kis kā paikar le gayā

kyuuñ nazar aatī nahīñ ab kaaTī sat.h-e-āb par

khīñch kar naddī ke sar se kaun chādar le gayā

phir huī āmāda-e-paikār peḌoñ se havā

phir koī jhoñkā ka.ī patte uḌā kar le gayā

rokte hī rah ga.e dīvār-o-dar 'āsif' mujhe

maiñ magar chup-chāp ḳhud ko ghar se bāhar le gayā

raushni ko tirgi ka qahr ban kar le gaya

aankh mein mahfuz the jitne bhi manzar le gaya

ajnabi sa lag raha hun aaj apne aap ko

aaine ke samne main kis ka paikar le gaya

kyun nazar aati nahin ab kaTi sath-e-ab par

khinch kar naddi ke sar se kaun chadar le gaya

phir hui aamada-e-paikar peDon se hawa

phir koi jhonka kai patte uDa kar le gaya

rokte hi rah gae diwar-o-dar 'asif' mujhe

main magar chup-chap KHud ko ghar se bahar le gaya