raushni le ke kahin chand kahin taron se

raushnī le ke kahīñ chāñd kahīñ tāroñ se

ham bhī guzre the kabhī vaqt ke bāzāroñ se

zindagī tujh se tire ġham se to inkār nahīñ

haañ magar lazzat-e-ġham chhin ga.ī ġham-ḳhvāroñ se

azmat-e-rafta kī miTtī huī tasvīr haiñ ham

ham ko laTkā.iyē girtī huī dīvāroñ se

is se pahle ki chhiḌe zikr-e-vafā pyaar kī baat

mashvara kar lo zarā vaqt kī sarkāroñ se

chāñd jis vaqt utar aatā hai paimānoñ meñ

mai-kade baat kiyā karte haiñ mai-ḳhvāroñ se

ham ko be-dām bhī bik jaane kā fan aatā hai

baat kahne kī nahīñ hai ye ḳharīdāroñ se

vahī tanhā.ī kī bāteñ haiñ vahī zaat ke ġham

mujh ko shikva hai mire duur ke fankāroñ se

abr-e-rahmat ko liye apnī nazar meñ 'ḳhusrav'

ham bhī to dasht se guzre kabhī kohsāroñ se

raushni le ke kahin chand kahin taron se

hum bhi guzre the kabhi waqt ke bazaron se

zindagi tujh se tere gham se to inkar nahin

han magar lazzat-e-gham chhin gai gham-KHwaron se

azmat-e-rafta ki miTti hui taswir hain hum

hum ko laTkaiyee girti hui diwaron se

is se pahle ki chhiDe zikr-e-wafa pyar ki baat

mashwara kar lo zara waqt ki sarkaron se

chand jis waqt utar aata hai paimanon mein

mai-kade baat kiya karte hain mai-KHwaron se

hum ko be-dam bhi bik jaane ka fan aata hai

baat kahne ki nahin hai ye KHaridaron se

wahi tanhai ki baaten hain wahi zat ke gham

mujh ko shikwa hai mere dur ke fankaron se

abr-e-rahmat ko liye apni nazar mein 'KHusraw'

hum bhi to dasht se guzre kabhi kohsaron se