raushni mujhse gurezan hai to shikwa bhi nahin

raushnī mujh se gurezāñ hai to shikva bhī nahīñ

mere ġham-ḳhāne meñ kuchh aisā añdherā bhī nahīñ

pursish-e-hāl kī fursat tumheñ mumkin hai na ho

pursish-e-hāl tabī'at ko gavārā bhī nahīñ

yuuñ sar-e-rāh mulāqāt huī hai aksar

tum ne dekhā bhī nahīñ ham ne pukārā bhī nahīñ

‘arz-e-ahvāl kī 'ādat bhī nahīñ hai ham ko

aur hālāt kā shāyad ye taqāzā bhī nahīñ

be-niyāzāna guzar jaa.e guzarne vaalā

mere pindār ko ab shauq-e-tamāshā bhī nahīñ

haath phailā.ūñ maiñ ‘īsā-nafasoñ ke aage

dard pahlū meñ mire hai magar itnā bhī nahīñ

ik shikan māthe pe dekhī thī tumhāre ham ne

phir kabhī aañkh uThā kar tumheñ dekhā bhī nahīñ

āḳhirī baar hañsī aa.ī thī kab yaad nahīñ

aur phir aa.e hañsī is kī tamanna bhī nahīñ

mere hālāt na badle to na badleñ 'iqbāl'

mujh ko hālāt pe kuchh aisā bharosa bhī nahīñ

raushni mujh se gurezan hai to shikwa bhi nahin

mere gham-KHane mein kuchh aisa andhera bhi nahin

pursish-e-haal ki fursat tumhein mumkin hai na ho

pursish-e-haal tabi'at ko gawara bhi nahin

yun sar-e-rah mulaqat hui hai aksar

tum ne dekha bhi nahin hum ne pukara bhi nahin

‘arz-e-ahwal ki 'adat bhi nahin hai hum ko

aur haalat ka shayad ye taqaza bhi nahin

be-niyazana guzar jae guzarne wala

mere pindar ko ab shauq-e-tamasha bhi nahin

hath phailaun main ‘isa-nafason ke aage

dard pahlu mein mere hai magar itna bhi nahin

ek shikan mathe pe dekhi thi tumhaare hum ne

phir kabhi aankh uTha kar tumhein dekha bhi nahin

aaKHiri bar hansi aai thi kab yaad nahin

aur phir aae hansi is ki tamanna bhi nahin

mere haalat na badle to na badlen 'iqbaal'

mujh ko haalat pe kuchh aisa bharosa bhi nahin