raunaton mein na itni bhi intiha ho jae

ra.ūnatoñ meñ na itnī bhī intihā ho jaa.e

ki aadmī na rahe aadmī ḳhudā ho jaa.e

usī ke paas ho sab iḳhtiyār bolne kā

aur us ke sāmne har shaḳhs be-sadā ho jaa.e

ghire hue haiñ ajab ahd-e-be-yaqīnī meñ

ḳhabar nahīñ ki kahāñ kis ke saath kyā ho jaa.e

kahāñ kahāñ se uThā.e saroñ kī fasl koī

tamām shahr hī jab dasht-e-karbalā ho jaa.e

ab is se baḌh ke tire saath kyā mohabbat ho

maiñ tujh ko yaad karūñ aur sāmnā ho jaa.e

ta.alluqāt meñ gunjā.isheñ to hotī haiñ

zarā sī baat pe kyā aadmī ḳhafā ho jaa.e

ham ahl-e-harf baḌe sāhab-e-karāmat haiñ

hamāre haath meñ patthar bhī aa.inā ho jaa.e

ham ik ishāre se ruḳh moḌ deñ havāoñ kā

nazar kareñ to samundar meñ rāstā ho jaa.e

kabhī to manzil-e-sub.h-e-yaqīñ mile 'ārif'

kahīñ to ḳhatm gumānoñ kā silsila ho jaa.e

raunaton mein na itni bhi intiha ho jae

ki aadmi na rahe aadmi KHuda ho jae

usi ke pas ho sab iKHtiyar bolne ka

aur us ke samne har shaKHs be-sada ho jae

ghire hue hain ajab ahd-e-be-yaqini mein

KHabar nahin ki kahan kis ke sath kya ho jae

kahan kahan se uThae saron ki fasl koi

tamam shahr hi jab dasht-e-karbala ho jae

ab is se baDh ke tere sath kya mohabbat ho

main tujh ko yaad karun aur samna ho jae

talluqat mein gunjaishen to hoti hain

zara si baat pe kya aadmi KHafa ho jae

hum ahl-e-harf baDe sahab-e-karamat hain

hamare hath mein patthar bhi aaina ho jae

hum ek ishaare se ruKH moD den hawaon ka

nazar karen to samundar mein rasta ho jae

kabhi to manzil-e-subh-e-yaqin mile 'arif'

kahin to KHatm gumanon ka silsila ho jae