rawan-dawan hai rah-e-taKHayyul jahan KHam-e-zulf ke qarin se

ravāñ-davāñ hai rah-e-taḳhayyul jahāñ ḳham-e-zulf ke qarīñ se

nazar ke dāman tak aa chalī hai lapaT ghanī chhāñv kī vahīñ se

tulūa shāyad hue haiñ sapnoñ ke an-ginat chāñd shāḳh-e-dil par

ki mauj-dar-mauj chāñdnī bah rahī hai ehsās kī jabīñ se

kuchh is tarah nuur phuuT niklā hai zarre-zarre se aarzū kā

maiñ jhāñktā huuñ falak kī āñkhoñ meñ jhuum kar vus.at-e-zamīñ se

rachā liyā hai vajūd terā yahīñ kahīñ dhyān ke ḳhalaf maiñ

ki mahkā mahkā dhuāñ sā palkoñ kā uTh rahā hai yahīñ kahīñ se

na jaane laa.e haiñ kitne asrār rang-o-bū ke nafas-nafas meñ

tirī judā.ī ke pal jo āvāze de rahe haiñ dil-e-hazīñ se

duā.eñ de ai samay kī maayā mirī ḳhud-āgāhiyoñ kī jaañ ko

ki pau phaTī hai karishma-e-shash-jihat ke irfān kī yahīñ se

rawan-dawan hai rah-e-taKHayyul jahan KHam-e-zulf ke qarin se

nazar ke daman tak aa chali hai lapaT ghani chhanw ki wahin se

tulua shayad hue hain sapnon ke an-ginat chand shaKH-e-dil par

ki mauj-dar-mauj chandni bah rahi hai ehsas ki jabin se

kuchh is tarah nur phuT nikla hai zarre-zarre se aarzu ka

main jhankta hun falak ki aankhon mein jhum kar wusat-e-zamin se

racha liya hai wajud tera yahin kahin dhyan ke KHalaf main

ki mahka mahka dhuan sa palkon ka uTh raha hai yahin kahin se

na jaane lae hain kitne asrar rang-o-bu ke nafas-nafas mein

teri judai ke pal jo aawaze de rahe hain dil-e-hazin se

duaen de ai samay ki maya meri KHud-agahiyon ki jaan ko

ki pau phaTi hai karishma-e-shash-jihat ke irfan ki yahin se