rawan hai qafila-e-justuju kidhar mera

ravāñ hai qāfila-e-justujū kidhar merā

koī samajh na sakā maqsad-e-safar merā

sukūn-e-rūh milā halqa-e-rasan meñ mujhe

vagarna bār-e-garāñ thā badan pe sar merā

maiñ apne haath ke chhāle dikhātā phirtā huuñ

dilā.e koī mujhe hissa-e-samar merā

har ik shajar hai mirā yuuñ to saare jañgal meñ

ajab sitam hai nahīñ sāya-e-shajar merā

kaho ye abr se kyā fā.eda barasne kā

ki ab to jal bhī chukā hai tamām ghar merā

isī liye mirī manzil na mil sakī mujh ko

ki mere saath ik rahzan thā ham-safar merā

rawan hai qafila-e-justuju kidhar mera

koi samajh na saka maqsad-e-safar mera

sukun-e-ruh mila halqa-e-rasan mein mujhe

wagarna bar-e-garan tha badan pe sar mera

main apne hath ke chhaale dikhata phirta hun

dilae koi mujhe hissa-e-samar mera

har ek shajar hai mera yun to sare jangal mein

ajab sitam hai nahin saya-e-shajar mera

kaho ye abr se kya faeda barasne ka

ki ab to jal bhi chuka hai tamam ghar mera

isi liye meri manzil na mil saki mujh ko

ki mere sath ek rahzan tha ham-safar mera