rawan rawan tha jab tera KHayal bhi

ravāñ ravāñ thā jab terā ḳhayāl bhī

to dil se pūchhe ham ne kuchh savāl bhī

havā hī tere shahar kī ajiib thī

bichhaḌne kā na thā koī malāl bhī

vo saath ho to sūjhtā na aur kuchh

hasīn kaifiyat meñ biite saal bhī

raqābatoñ ko samjhe ham rifāqateñ

likhā thā hāthoñ apne hī zavāl bhī

vo kahtā hai hathelī chuum kar merī

kisī lakīr meñ to ho visāl bhī

savāl ishq se hī pūchhne lage

hai bevafā.ī kā aisā vabāl bhī

liye haiñ bose ham ne tere naam ke

vo pahle ishq kā dekhā kamāl bhī

rawan rawan tha jab tera KHayal bhi

to dil se puchhe hum ne kuchh sawal bhi

hawa hi tere shahar ki ajib thi

bichhaDne ka na tha koi malal bhi

wo sath ho to sujhta na aur kuchh

hasin kaifiyat mein bite sal bhi

raqabaton ko samjhe hum rifaqaten

likha tha hathon apne hi zawal bhi

wo kahta hai hatheli chum kar meri

kisi lakir mein to ho visal bhi

sawal ishq se hi puchhne lage

hai bewafai ka aisa wabaal bhi

liye hain bose hum ne tere nam ke

wo pahle ishq ka dekha kamal bhi