رویہ دیکھ کر ان کا تو ہم ناشاد ہو بیٹھے

رویہ دیکھ کر ان کا تو ہم ناشاد ہو بیٹھے

بھلا لہجے سے وہ کیوں نشتر فصاد ہو بیٹھے

زمانے بھر میں اپنے نام کا ڈنکا بھی بجتا تھا

پر اجڑے یوں کہ ہم تو صورت بغداد ہو بیٹھے

کہا فرہاد نے اپنی مریدی میں مجھے لے لیں

سنا کر قصۂ غم مرشد فرہاد ہو بیٹھے

عمارت اپنے خوابوں کی بنانے کا کیا آغاز

تو خود ہم اینٹ بن بیٹھے خودی بنیاد ہو بیٹھے

گئے وقتوں میں ایسا تھا یہاں کچھ کم شکاری تھے

نئے وقتوں میں دیکھو تو سبھی صیاد ہو بیٹھے

یہاں پر کون زندہ اب رکھے اپنی روایت کو

یہاں پر لوگ جو مادر پدر آزاد ہو بیٹھے

جنہیں تھا عشق سے مطلب وہ سولی چڑھ گئے آخر

جنہیں دولت سے مطلب تھا وہ سب شداد ہو بیٹھے

اثر بے موسمی طوفان کا گلشن پہ گہرا ہے

کبھی جو پھول ہوتے تھے وہ اب فولاد ہو بیٹھے

کبھی غلطی سے جو مصرع ملا لیتے ہیں اکثر وہ

سمجھتے ہیں کہ اب ہم میرؔ کے استاد ہو بیٹھے

کسیں اقبالؔ پر بولی کریں باتیں غزالیؔ پر

بلا تحقیق ہی یہ سب یہاں نقاد ہو بیٹھے