rawayye mar dete hain ye lahje mar dete hain

ravayye maar dete haiñ ye lahje maar dete haiñ

vahī jo jaan se pyāre haiñ rishte maar dete haiñ

kabhī barsoñ guzarne par kahīñ bhī kuchh nahīñ hotā

kabhī aisā bhī hotā hai ki lamhe maar dete haiñ

kabhī manzil pe jaane ke nishāñ tak bhī nahīñ milte

jo rastoñ meñ bhaTak jaa.eñ to raste maar dete haiñ

kahānī ḳhatm hotī hai kabhī anjām se pahle

adhūre nā-mukammal se ye qisse maar dete haiñ

hazāroñ vaar duniyā ke sahe jaate haiñ hañs hañs ke

magar apnoñ ke ta.ane aur shikve maar dete haiñ

mujhe aksar ye lagtā hai ki jaise huuñ nahīñ huuñ maiñ

mujhe hone na hone ke ye ḳhadshe maar dete haiñ

kabhī marne se pahle bhī bashar ko marnā paḌtā hai

yahāñ jiine ke milte haiñ jo sadme maar dete haiñ

bahut ehsān jatāne se ta.alluq TuuT jaatā hai

bahut īsār-o-qurbānī ke jazbe maar dete haiñ

kabhī tūfāñ kī zad se bhī safīne bach nikalte haiñ

kabhī sālim safīnoñ ko kināre maar dete haiñ

vo hissa kaaT Daalā zahr kā ḳhadsha rahā jis meñ

jo baaqī rah ga.e mujh meñ vo hisse maar dete haiñ

jo āñkhoñ meñ raheñ 'nuzhat' vahī to ḳhvāb achchhe haiñ

jinheñ ta.abīr mil jaa.e vo sapne maar dete haiñ

rawayye mar dete hain ye lahje mar dete hain

wahi jo jaan se pyare hain rishte mar dete hain

kabhi barson guzarne par kahin bhi kuchh nahin hota

kabhi aisa bhi hota hai ki lamhe mar dete hain

kabhi manzil pe jaane ke nishan tak bhi nahin milte

jo raston mein bhaTak jaen to raste mar dete hain

kahani KHatm hoti hai kabhi anjam se pahle

adhure na-mukammal se ye qisse mar dete hain

hazaron war duniya ke sahe jate hain hans hans ke

magar apnon ke tane aur shikwe mar dete hain

mujhe aksar ye lagta hai ki jaise hun nahin hun main

mujhe hone na hone ke ye KHadshe mar dete hain

kabhi marne se pahle bhi bashar ko marna paDta hai

yahan jine ke milte hain jo sadme mar dete hain

bahut ehsan jatane se talluq TuT jata hai

bahut isar-o-qurbani ke jazbe mar dete hain

kabhi tufan ki zad se bhi safine bach nikalte hain

kabhi salim safinon ko kinare mar dete hain

wo hissa kaT Dala zahr ka KHadsha raha jis mein

jo baqi rah gae mujh mein wo hisse mar dete hain

jo aankhon mein rahen 'nuzhat' wahi to KHwab achchhe hain

jinhen tabir mil jae wo sapne mar dete hain