rawish rawish par junun ke aage KHirad ke zalim maqam kab tak

ravish ravish par junūñ ke aage ḳhirad ke zālim maqām kab tak

jhukī jhukī sī nazar kahāñ tak rukā rukā sā ḳhirām kab tak

ye ehtiyāt-e-karam kahāñ tak ye zahmat-e-gām-gām kab tak

nafas nafas meñ payām kab tak nazar nazar meñ salām kab tak

ye bandagī hai to bandagī kā fareb rusvā-e-ām kab tak

laboñ pe sub.heñ to haiñ musallam magar ye sīnoñ meñ shaam tak

rukī sī aaheñ jhukī nigāheñ vahī haqīqat vahī fasāna

sukūt terā sukūt kab tak kalām terā kalām kab tak

tire kināre na tere dhāre tirī halākat nahīñ to kyā hai

tire safīnoñ se sāhiloñ par ye mauj kā intiqām kab tak

yahī jamāl-e-gul-o-suḳhan hai to aa chaman se dhuāñ uThāveñ

ravish ravish par bichhe raheñge ye lāla-o-gul ke daam kab tak

na dosh-e-tūfāñ na āshiyāna na bijliyoñ par kamand terī

yahī chaman hai to is chaman meñ tire nasheman kā naam kab tak

na nuur terā na aag terī rabāb TuuTe sharāb chhūTī

ye zulmat-e-anjuman kahāñ tak ye tohmat-e-jām-jām kab tak

agar na barham hoñ ahl-e-mahfil to ahl-e-mahfil se 'shor' pūchhūñ

koī batā de ki mere hoñToñ pe us kā naġhma harām kab tak

rawish rawish par junun ke aage KHirad ke zalim maqam kab tak

jhuki jhuki si nazar kahan tak ruka ruka sa KHiram kab tak

ye ehtiyat-e-karam kahan tak ye zahmat-e-gam-gam kab tak

nafas nafas mein payam kab tak nazar nazar mein salam kab tak

ye bandagi hai to bandagi ka fareb ruswa-e-am kab tak

labon pe subhen to hain musallam magar ye sinon mein sham tak

ruki si aahen jhuki nigahen wahi haqiqat wahi fasana

sukut tera sukut kab tak kalam tera kalam kab tak

tere kinare na tere dhaare teri halakat nahin to kya hai

tere safinon se sahilon par ye mauj ka intiqam kab tak

yahi jamal-e-gul-o-suKHan hai to aa chaman se dhuan uThawen

rawish rawish par bichhe rahenge ye lala-o-gul ke dam kab tak

na dosh-e-tufan na aashiyana na bijliyon par kamand teri

yahi chaman hai to is chaman mein tere nasheman ka nam kab tak

na nur tera na aag teri rabab TuTe sharab chhuTi

ye zulmat-e-anjuman kahan tak ye tohmat-e-jam-jam kab tak

agar na barham hon ahl-e-mahfil to ahl-e-mahfil se 'shor' puchhun

koi bata de ki mere honTon pe us ka naghma haram kab tak