rawish rawish pe jawani ke tajdar aae

ravish ravish pe javānī ke tājdār aa.e

junūñ ke qāfile vābasta-e-bahār aa.e

vo raat jis kā baḌā intizār thā dil ko

vo raat dard ke pahlū meñ ham guzār aa.e

milā javāb haram se na but-kade se kahīñ

galī galī meñ tire naam ko pukār aa.e

ḳhudā kare mirī rātoñ meñ kā.enāt-e-jamāl

ga.ī bahār ko le kar hazār baar aa.e

kisī kī yaad ke jalvoñ ke be-qarār hujūm

ufuq se chāñd jo ubhrā to ashk-bār aa.e

jo hone vaalā hai ho kar rahegā 'mīr' āḳhir

magar majāl hai dil ko kahīñ qarār aa.e

rawish rawish pe jawani ke tajdar aae

junun ke qafile wabasta-e-bahaar aae

wo raat jis ka baDa intizar tha dil ko

wo raat dard ke pahlu mein hum guzar aae

mila jawab haram se na but-kade se kahin

gali gali mein tere nam ko pukar aae

KHuda kare meri raaton mein kaenat-e-jamal

gai bahaar ko le kar hazar bar aae

kisi ki yaad ke jalwon ke be-qarar hujum

ufuq se chand jo ubhra to ashk-bar aae

jo hone wala hai ho kar rahega 'mir' aaKHir

magar majal hai dil ko kahin qarar aae