dil ko maal-e-ishq se begana kijiye

dil ko ma.āl-e-'ishq se begāna kījiye

parvāna kah rahā hai ki parvā na kījiye

har ḳhvāb nā-guzīr hai har kaam farz hai

kis kis se haath khīñchiye kyā kyā na kījiye

vo baat jo abhī abhī maiñ ne nahīñ sunī

vo baat ho sake to dubāra na kījiye

muḳhlis haiñ aur vo bhī mujh aise haqīr se

apne hī saath aap ye dhoka na kījiye

kyā sach meñ aap jī nahīñ sakte mire baġhair

to phir koī javāz muhayyā na kījiye

itnī bhī merī darguzarī mustaqil nahīñ

kitnī daf'a kahā hai ki aisā na kījiye

haañ shukr to zarūr bajā lā.iye huzūr

lekin hamāre zabt pe takiya na kījiye

achchhā hai infirād bhī apnī jagah magar

'javvād' koī kaam to ulTā na kījiye

dil ko maal-e-'ishq se begana kijiye

parwana kah raha hai ki parwa na kijiye

har KHwab na-guzir hai har kaam farz hai

kis kis se hath khinchiye kya kya na kijiye

wo baat jo abhi abhi main ne nahin suni

wo baat ho sake to dubara na kijiye

muKHlis hain aur wo bhi mujh aise haqir se

apne hi sath aap ye dhoka na kijiye

kya sach mein aap ji nahin sakte mere baghair

to phir koi jawaz muhayya na kijiye

itni bhi meri darguzari mustaqil nahin

kitni daf'a kaha hai ki aisa na kijiye

han shukr to zarur baja laiye huzur

lekin hamare zabt pe takiya na kijiye

achchha hai infirad bhi apni jagah magar

'jawwad' koi kaam to ulTa na kijiye