ret qabiz thi bahut KHamosh lagti thi nadi

ret qābiz thī bahut ḳhāmosh lagtī thī nadī

paar karte vaqt ye jaanā ki gahrī thī nadī

jis jagah ab hai ghanī ābādiyoñ kā silsila

kal usī qasbe ke bīchoñ-bīch bahtī thī nadī

ek haibatnāk manzar dil ko dahlātā huā

rāsta apnā achānak phir se badlī thī nadī

us ke andar kī ḳhamoshī meñ ġhazab kā raaz thā

apne ik maḳhsūs lai meñ gungunātī thī nadī

mil ke lahroñ se bhī sañgam ko tarastī hī rahī

is safar meñ aisā lagtā hai akelī thī nadī

dekh qadmoñ kī thakan vo roktī apnā bahāo

aur mere ik ishāre par hī chaltī thī nadī

ye bharam thā so rahī hai vo bhañvar-āġhosh meñ

Dūbne kī aa ga.ī naubat ki jaagī thī nadī

ab baḌī ho kar samundar kī tarah lagne lagī

chand barsoñ pahle dekhā thā to chhoTī thī nadī

pul shikasta thā magar sayyāh to be-ḳhauf the

garmiyoñ ke din the chāroñ samt sūkhī thī nadī

ret qabiz thi bahut KHamosh lagti thi nadi

par karte waqt ye jaana ki gahri thi nadi

jis jagah ab hai ghani aabaadiyon ka silsila

kal usi qasbe ke bichon-bich bahti thi nadi

ek haibatnak manzar dil ko dahlata hua

rasta apna achanak phir se badli thi nadi

us ke andar ki KHamoshi mein ghazab ka raaz tha

apne ek maKHsus lai mein gungunati thi nadi

mil ke lahron se bhi sangam ko tarasti hi rahi

is safar mein aisa lagta hai akeli thi nadi

dekh qadmon ki thakan wo rokti apna bahao

aur mere ek ishaare par hi chalti thi nadi

ye bharam tha so rahi hai wo bhanwar-aghosh mein

Dubne ki aa gai naubat ki jagi thi nadi

ab baDi ho kar samundar ki tarah lagne lagi

chand barson pahle dekha tha to chhoTi thi nadi

pul shikasta tha magar sayyah to be-KHauf the

garmiyon ke din the chaaron samt sukhi thi nadi