reza reza hi tha mismar purana ghar tha

reza reza hī thā mismār purānā ghar thā

apne hone se hī bezār purānā ghar thā

silvaTeñ jism kī jaisī hī thiiñ dīvāroñ par

aur nazroñ meñ magar pyaar purānā ghar thā

tajraba umr meñ pinhāñ thā liyāqat jaise

jaise raushan koī mīnār purānā ghar thā

ukhḌā ukhḌā sā thā lahja to Tapaktī chhat thī

par thā saaya bhī fagan-dār purānā ghar thā

bikhrā bikhrā thā mohabbat meñ magar yakjā thā

thā hamārā bhī to ġham-ḳhvār purānā ghar thā

konā konā thā hamāre liye pairo-kārī

aur ḳhud ke liye nādār purānā ghar thā

ḳhud ke īmān kī bhī fikr duā bhī sab ko

phuul hī phuul the gulzār purānā ghar thā

'shāh' jab se vo gayā dard kā darmāñ de kar

phuul lagte haiñ mujhe ḳhaar purānā ghar thā

reza reza hi tha mismar purana ghar tha

apne hone se hi bezar purana ghar tha

silwaTen jism ki jaisi hi thin diwaron par

aur nazron mein magar pyar purana ghar tha

tajraba umr mein pinhan tha liyaqat jaise

jaise raushan koi minar purana ghar tha

ukhDa ukhDa sa tha lahja to Tapakti chhat thi

par tha saya bhi fagan-dar purana ghar tha

bikhra bikhra tha mohabbat mein magar yakja tha

tha hamara bhi to gham-KHwar purana ghar tha

kona kona tha hamare liye pairo-kari

aur KHud ke liye nadar purana ghar tha

KHud ke iman ki bhi fikr dua bhi sab ko

phul hi phul the gulzar purana ghar tha

'shah' jab se wo gaya dard ka darman de kar

phul lagte hain mujhe KHar purana ghar tha