rida-e-ahani har aadmi ke sar par hai

ridā-e-āhanī har aadmī ke sar par hai

ki jaise sañg kī bārish isī nagar par hai

na kho jo muTThī meñ uñglī kisī kī ham-safaro

hamārā qāfila anjānī rahguzar par hai

bachā rahā thā jo kal raat kaalī āñdhī se

vo phal chaḌhā huā har shaḳhs kī nazar par hai

vo kaun roī thī kājal lagā ke āñkhoñ meñ

ye dhabba dhabba siyāhī ruḳh-e-sahar par hai

shikasta-hālī pe har iiñT jin kī hañstī hai

unheñ ġhurūr usī TuuTe phūTe ghar par hai

kab ehtirām kī ḳhātir jhukī mirī gardan

ki ik laTaktī sī talvār mere sar par hai

sadā lagā ke kabhī kā chalā gayā koī

ye bāzgasht sadā kyuuñ tumhāre dar par hai

zarā pata to lagā.eñ lahū hai kyuuñ taaza

jo ik zamāne se mahloñ ke is khañDar par hai

chhupā.e rakhnā thā aise ḳhushī ke mauqe par

vo ek daaġh jo peshānī-e-zafar par hai

baḌā hī ḳhauf lagā rahtā hai phisalne kā

safar hamārā abhī giilī rahguzar par hai

maiñ jhuuT kaise kahūñ sach to kah nahīñ saktā

kuchh hāshiya bhī lagā raat kī ḳhabar par hai

rida-e-ahani har aadmi ke sar par hai

ki jaise sang ki barish isi nagar par hai

na kho jo muTThi mein ungli kisi ki ham-safaro

hamara qafila anjaani rahguzar par hai

bacha raha tha jo kal raat kali aandhi se

wo phal chaDha hua har shaKHs ki nazar par hai

wo kaun roi thi kajal laga ke aankhon mein

ye dhabba dhabba siyahi ruKH-e-sahar par hai

shikasta-haali pe har inT jin ki hansti hai

unhen ghurur usi TuTe phuTe ghar par hai

kab ehtiram ki KHatir jhuki meri gardan

ki ek laTakti si talwar mere sar par hai

sada laga ke kabhi ka chala gaya koi

ye bazgasht sada kyun tumhaare dar par hai

zara pata to lagaen lahu hai kyun taza

jo ek zamane se mahlon ke is khanDar par hai

chhupae rakhna tha aise KHushi ke mauqe par

wo ek dagh jo peshani-e-zafar par hai

baDa hi KHauf laga rahta hai phisalne ka

safar hamara abhi gili rahguzar par hai

main jhuT kaise kahun sach to kah nahin sakta

kuchh hashiya bhi laga raat ki KHabar par hai