rida-e-abr nahin KHema-e-ghubar nahin

ridā-e-abr nahīñ ḳhema-e-ġhubār nahīñ

mirā safar kisī pahlū se sāzgār nahīñ

tanī huī hai dhanak kī tarah lahū kī kamāñ

lagā vo tiir jo manzar ke ār-pār nahīñ

hamārī raah se lashkar ġhamoñ ke guzre haiñ

hamāre jism pe zaḳhmoñ kā kuchh shumār nahīñ

khilī huī hai zamistāñ kī dhuup āñgan meñ

chale bhī aao ki mausam kā e.atibār nahīñ

kuchh aur der jalā.e rakho lahū ke charāġh

ḳhalīj-e-shab hai ye sahrā-e-be-kanār nahīñ

hamārī ḳhaak ko rakh kar havā ke raste meñ

diyā hai ġham bhī ik aisā jo pā.edār nahīñ

rida-e-abr nahin KHema-e-ghubar nahin

mera safar kisi pahlu se sazgar nahin

tani hui hai dhanak ki tarah lahu ki kaman

laga wo tir jo manzar ke aar-par nahin

hamari rah se lashkar ghamon ke guzre hain

hamare jism pe zaKHmon ka kuchh shumar nahin

khili hui hai zamistan ki dhup aangan mein

chale bhi aao ki mausam ka eatibar nahin

kuchh aur der jalae rakho lahu ke charagh

KHalij-e-shab hai ye sahra-e-be-kanar nahin

hamari KHak ko rakh kar hawa ke raste mein

diya hai gham bhi ek aisa jo paedar nahin