rifaqat mein rafiqon ki riya-kari bhi shamil hai

rifāqat meñ rafīqoñ kī riyā-kārī bhī shāmil hai

mirī āsāniyoñ meñ kār-e-dushvārī bhī shāmil hai

ba-juz tasvīr-e-gul ke baaġh meñ dekhūñ to kyā dekhūñ

'aqīdat ke asar meñ ḳhud se be-zārī bhī shāmil hai

naqāhat kā hai ġhalba so jhukā dete haiñ sar apnā

itā.at ke 'amal meñ apnī lāchārī bhī shāmil hai

musalsal band āñkhoñ se manāzir dekhtā huuñ maiñ

ḳhayāl-o-ḳhvāb meñ ehsās-e-bedārī bhī shāmil hai

'ayāñ hote haiñ ab mujh par kamāl-o-fan ke sab jalve

ġham-e-ḳhāshāk meñ lagtā hai chingārī bhī shāmil hai

kabhī vo ḳhuuñ bahātā hai kabhī aañsū bahātā hai

'adāvat kī adā meñ tarz-e-ġham-ḳhvārī bhī shāmil hai

samajhne sochne se hī nahīñ miltī mujhe fursat

mirī masrūfiyat meñ shaġhl-e-be-kārī bhī shāmil hai

gadāoñ ko taraste haiñ sabhī jāh-o-hasham vaale

amīrī kī 'atā meñ lutf-e-nādārī bhī shāmil hai

na jiitā hai na martā hai 'ajab insān hai 'rāhat'

na.ī bīmāriyoñ meñ ab ye bīmārī bhī shāmil hai

rifaqat mein rafiqon ki riya-kari bhi shamil hai

meri aasaniyon mein kar-e-dushwari bhi shamil hai

ba-juz taswir-e-gul ke bagh mein dekhun to kya dekhun

'aqidat ke asar mein KHud se be-zari bhi shamil hai

naqahat ka hai ghalba so jhuka dete hain sar apna

itaat ke 'amal mein apni lachaari bhi shamil hai

musalsal band aankhon se manazir dekhta hun main

KHayal-o-KHwab mein ehsas-e-bedari bhi shamil hai

'ayan hote hain ab mujh par kamal-o-fan ke sab jalwe

gham-e-KHashak mein lagta hai chingari bhi shamil hai

kabhi wo KHun bahata hai kabhi aansu bahata hai

'adawat ki ada mein tarz-e-gham-KHwari bhi shamil hai

samajhne sochne se hi nahin milti mujhe fursat

meri masrufiyat mein shaghl-e-be-kari bhi shamil hai

gadaon ko taraste hain sabhi jah-o-hasham wale

amiri ki 'ata mein lutf-e-nadari bhi shamil hai

na jita hai na marta hai 'ajab insan hai 'rahat'

nai bimariyon mein ab ye bimari bhi shamil hai