riha kar mujhe ya saza de ai aadil

rihā kar mujhe yā sazā de ai 'ādil

koī faisla to sunā de ai 'ādil

asīrī meñ jiinā hai tauhīn merī

mujhe daar par to chaḌhā de ai 'ādil

kahāñ 'adl mujh ko zamīñ par milegā

koī rāsta hī dikhā de ai 'ādil

mujhe aglī tārīḳh meñ ab ḳhudārā

qayāmat kā din hī batā de ai 'ādil

vo mujrim hai us kī jagah hai kaTahrā

use taḳht se to uThā de ai 'ādil

re'āyā pe qānūn jo chal rahā hai

vahī hākimoñ pe chalā de ai 'ādil

faqat jo kitāboñ meñ dam le rahā hai

vo qānūn saarā jalā de ai 'ādil

kahīñ maiñ na apnī 'adālat lagā luuñ

mire mujrimoñ ko sazā de ai 'ādil

vakīloñ kā biknā 'ayāñ ho chukā hai

tū apnī haqīqat dikhā de ai 'ādil

kabhī bhaag paa.eñ na jis se ye ġhāsib

koī jail aisī banā de ai 'ādil

riha kar mujhe ya saza de ai 'adil

koi faisla to suna de ai 'adil

asiri mein jina hai tauhin meri

mujhe dar par to chaDha de ai 'adil

kahan 'adl mujh ko zamin par milega

koi rasta hi dikha de ai 'adil

mujhe agli tariKH mein ab KHudara

qayamat ka din hi bata de ai 'adil

wo mujrim hai us ki jagah hai kaTahra

use taKHt se to uTha de ai 'adil

re'aya pe qanun jo chal raha hai

wahi hakimon pe chala de ai 'adil

faqat jo kitabon mein dam le raha hai

wo qanun sara jala de ai 'adil

kahin main na apni 'adalat laga lun

mere mujrimon ko saza de ai 'adil

wakilon ka bikna 'ayan ho chuka hai

tu apni haqiqat dikha de ai 'adil

kabhi bhag paen na jis se ye ghasib

koi jail aisi bana de ai 'adil