rim-jhim hai ye ashkon ki rawani hai ki kya hai

rim-jhim hai ye ashkoñ kī ravānī hai ki kyā hai

aa dekh mirī aañkh meñ paanī hai ki kyā hai

anvār ke dhāre haiñ ye ḳhushbū hai ki tum ho

āñchal hai koī raat kī raanī hai ki kyā hai

sho.ala hai ye shabnam hai ki titlī hai kalī hai

ik bahr-e-suḳhan terī javānī hai ki kyā hai

ye chāñd sā chehra hai ki sūraj kī kiran hai

zulfeñ haiñ tirī raat suhānī hai ki kyā hai

lagtā hai falak ham ko agar misra-e-ūlā

to phir ye zamīñ misra-e-sānī hai ki kyā hai

hoñToñ pe larazte hue dam toḌ chukā hai

be-kār koī qissa kahānī hai ki kyā hai

'yāsir' hai mohabbat ko samajhnā bhī musībat

taaza bhī nahīñ hai to purānī hai ki kyā hai

rim-jhim hai ye ashkon ki rawani hai ki kya hai

aa dekh meri aankh mein pani hai ki kya hai

anwar ke dhaare hain ye KHushbu hai ki tum ho

aanchal hai koi raat ki rani hai ki kya hai

shoala hai ye shabnam hai ki titli hai kali hai

ek bahr-e-suKHan teri jawani hai ki kya hai

ye chand sa chehra hai ki suraj ki kiran hai

zulfen hain teri raat suhani hai ki kya hai

lagta hai falak hum ko agar misra-e-ula

to phir ye zamin misra-e-sani hai ki kya hai

honTon pe larazte hue dam toD chuka hai

be-kar koi qissa kahani hai ki kya hai

'yasir' hai mohabbat ko samajhna bhi musibat

taza bhi nahin hai to purani hai ki kya hai