rind-e-baada-nosh jis ka mai-kade mein nam tha

rind-e-bāda-nosh jis kā mai-kade meñ naam thā

sāqiyā mahfil meñ terī vo hī tishna-kām thā

is jahān-e-ārzū meñ āshnā koī na thā

thā agar kuchh āshnā to dard-e-be-ārām thā

aaj kyoñ azmat kā parcham hai hamārā sar-nigūñ

bām-o-dar par shahr ke kal tak isī kā naam thā

jalte rahnā kīna-o-buġhz-o-hasad kī aag meñ

kyā tire aslāf kā ai dil yahī paiġhām thā

har taraf suunā samāñ thā ḳhāmushī kā raaj thā

jo bhī tair-e-ḳhush-navā thā vo asīr-e-dām thā

mā-sivā is nīm-jāñ aur be-kas-o-nādār ke

'faiz' terā thā sabhī par aur lutf-e-ām thā

rind-e-baada-nosh jis ka mai-kade mein nam tha

saqiya mahfil mein teri wo hi tishna-kaam tha

is jahan-e-arzu mein aashna koi na tha

tha agar kuchh aashna to dard-e-be-aram tha

aaj kyon azmat ka parcham hai hamara sar-nigun

baam-o-dar par shahr ke kal tak isi ka nam tha

jalte rahna kina-o-bughz-o-hasad ki aag mein

kya tere aslaf ka ai dil yahi paigham tha

har taraf suna saman tha KHamushi ka raj tha

jo bhi tair-e-KHush-nawa tha wo asir-e-dam tha

ma-siwa is nim-jaan aur be-kas-o-nadar ke

'faiz' tera tha sabhi par aur lutf-e-am tha