رشتہ بنا لیا تو نبھانے کی فکر کر

رشتہ بنا لیا تو نبھانے کی فکر کر

مل کر چراغ عشق جلانے کی فکر کر

جینے کی آرزو کے لیے خواب چاہیئے

پلکوں پہ چند خواب سجانے کی فکر کر

بھٹکا ہوں جنگلوں میں نہ جانے کہاں کہاں

اب تو مجھے تو راہ دکھانے کی فکر کر

ملنے سے روک دیتی ہے ہم کو یہ بارہا

دیوار درمیاں کو گرانے کی فکر کر

نشہ تو بوتلوں کا چڑھا اور اتر گیا

ساقی شراب حسن پلانے کی فکر کر

تو آسمان سر پہ اٹھانے کی بات چھوڑ

پیروں تلے زمین بچانے کی فکر کر