rishta-e-dil bhi kisi din KHwab sa ho jaega

rishta-e-dil bhī kisī din ḳhvāb sā ho jā.egā

tere mere darmiyāñ vo fāsla ho jā.egā

piilī piilī rut judā.ī kī achānak aa.egī

qurbatoñ kā sabz mausam bevafā ho jā.egā

aa.ine rañgoñ ke ḳhālī chhoḌ jā.egī dhanak

hairateñ rah jā.eñgī manzar judā ho jā.egā

kyā nishāna Thiik baiThegā havā-e-tez meñ

jo kamāñ se tiir niklegā ḳhatā ho jā.egā

terī peshānī pe bhī paḌ jā.eñge talḳhī se bal

merī sachchī baat par tū bhī ḳhafā ho jā.egā

ghar se niklūñgā hathelī par liye ujlā charāġh

'ilm hai kaalī havā kā sāmnā ho jā.egā

aane vaale jaane vāloñ kā badal hote nahīñ

par nahīñ hogā jo paidā ik ḳhalā ho jā.egā

TuuT jā.egā dar-e-dīvār-e-zindāñ kā ġhurūr

ek āvāz aa.egī qaidī rihā ho jā.egā

maiñ nahīñ to aur hī baiThegā koī chhāñv meñ

aaj kā chhoTā sā buuTā kal baḌā ho jā.egā

āstīnoñ se nikāleñge jiyāle āftāb

bol-bālā raushnī ke shahr kā ho jā.egā

chāñd ko DhūñDeñgī āñkheñ phir na sūraj ko 'rashīd'

chāñd-sūraj se ta'alluq dūsrā ho jā.egā

rishta-e-dil bhi kisi din KHwab sa ho jaega

tere mere darmiyan wo fasla ho jaega

pili pili rut judai ki achanak aaegi

qurbaton ka sabz mausam bewafa ho jaega

aaine rangon ke KHali chhoD jaegi dhanak

hairaten rah jaengi manzar juda ho jaega

kya nishana Thik baiThega hawa-e-tez mein

jo kaman se tir niklega KHata ho jaega

teri peshani pe bhi paD jaenge talKHi se bal

meri sachchi baat par tu bhi KHafa ho jaega

ghar se niklunga hatheli par liye ujla charagh

'ilm hai kali hawa ka samna ho jaega

aane wale jaane walon ka badal hote nahin

par nahin hoga jo paida ek KHala ho jaega

TuT jaega dar-e-diwar-e-zindan ka ghurur

ek aawaz aaegi qaidi riha ho jaega

main nahin to aur hi baiThega koi chhanw mein

aaj ka chhoTa sa buTa kal baDa ho jaega

aastinon se nikalenge jiyale aaftab

bol-baala raushni ke shahr ka ho jaega

chand ko DhunDengi aankhen phir na suraj ko 'rashid'

chand-suraj se ta'alluq dusra ho jaega