rishton mein bhi aai siyasat kaisi be-imani hai

rishtoñ meñ bhī aa.ī siyāsat kaisī be-īmānī hai

haiñ saare alfāz shagufta lahje meñ vīrānī hai

ho gayā mushkil kaise chhupā.ūñ sar se le kar paañv talak

apnī chādar phaT saktī hai aisī khīñchā-tānī hai

us ko paane kī koshish meñ jaan tirī halkān hai kyuuñ

duniyā andar se pītal uupar sone kā paanī hai

is hammām meñ sab nañge haiñ kis pe uThā.e uñglī kaun

apnī apnī chaukhaT hai apnī apnī peshānī hai

maiñ apne kamre meñ baiThā tanhā tanhā jaltā huuñ

chhat par chham-chham naach rahī hai kaisī barkhā raanī hai

aate jaate lamhe us ko dekh rahe haiñ hairat se

taḳht banāyā hai sone kā do din kī sultānī hai

ham ne kiyā 'maqsūd' ḳhasāre kā ye saudā jīvan bhar

apne baare meñ nahīñ sochā baat sabhoñ kī maanī hai

rishton mein bhi aai siyasat kaisi be-imani hai

hain sare alfaz shagufta lahje mein virani hai

ho gaya mushkil kaise chhupaun sar se le kar panw talak

apni chadar phaT sakti hai aisi khincha-tani hai

us ko pane ki koshish mein jaan teri halkan hai kyun

duniya andar se pital upar sone ka pani hai

is hammam mein sab nange hain kis pe uThae ungli kaun

apni apni chaukhaT hai apni apni peshani hai

main apne kamre mein baiTha tanha tanha jalta hun

chhat par chham-chham nach rahi hai kaisi barkha rani hai

aate jate lamhe us ko dekh rahe hain hairat se

taKHt banaya hai sone ka do din ki sultani hai

hum ne kiya 'maqsud' KHasare ka ye sauda jiwan bhar

apne bare mein nahin socha baat sabhon ki mani hai