riwaq-e-kahkashan se bhi ho aage tak guzar tera

rivāq-e-kahkashāñ se bhī ho aage tak guzar terā

ki terā ishq hai manzil tirī azm-e-safar terā

ramīda vus.ateñ huuñ tundī-e-raftār se terī

barī ho tañgī-e-afkār se āhū-e-sar terā

zamāna Thahar kar pūchhe terī raftār-o-sur.at se

mujhe bhī saath letā chal irāda hai kidhar terā

hayāt muḳhtasar aur be-karānī sail-e-imkāñ kī

raqam hogā sar-e-aflāk qissa mo'atabar terā

kisī bahr-e-muhīt-e-be-karāñ kī aarzū meñ hai

ye tūfānoñ kī maujoñ meñ sañvarne kā hunar terā

miyān-e-āb-o-gil ik barq hai sho.ala hai shabnam hai

ye dil ye qatra-e-ḳhūñ ye vajūd-e-muḳhtasar terā

taḌap ki justujū kī raah meñ ye bhī ibādat hai

tirī har āh-e-sozāñ hai pyām-e-pur-asar terā

musāfir hai masāfat kā sila hai ābla-pā.ī

bhalā kab saath chhoḌegī ye gardish umr-bhar terā

jalan āñkhoñ meñ sūkhe lab ġhubār-e-zindagī ruḳh par

thakan kī dāstāñ kahtā hai huliya sar-ba-sar terā

kabhī rakh kar kisī zaanū pe sar ārām bhī kar lī

ghanī hai chhāñv kyuuñ khultā nahīñ band kamar terā

charāġh-e-ārzū kī lau bhaḌakne de abhī 'farhat'

vahī tanhā shab-e-furqat meñ hogā ham-safar terā

riwaq-e-kahkashan se bhi ho aage tak guzar tera

ki tera ishq hai manzil teri azm-e-safar tera

ramida wusaten hun tundi-e-raftar se teri

bari ho tangi-e-afkar se aahu-e-sar tera

zamana Thahar kar puchhe teri raftar-o-surat se

mujhe bhi sath leta chal irada hai kidhar tera

hayat muKHtasar aur be-karani sail-e-imkan ki

raqam hoga sar-e-aflak qissa mo'atabar tera

kisi bahr-e-muhit-e-be-karan ki aarzu mein hai

ye tufanon ki maujon mein sanwarne ka hunar tera

miyan-e-ab-o-gil ek barq hai shoala hai shabnam hai

ye dil ye qatra-e-KHun ye wajud-e-muKHtasar tera

taDap ki justuju ki rah mein ye bhi ibaadat hai

teri har aah-e-sozan hai pyam-e-pur-asar tera

musafir hai masafat ka sila hai aabla-pai

bhala kab sath chhoDegi ye gardish umr-bhar tera

jalan aankhon mein sukhe lab ghubar-e-zindagi ruKH par

thakan ki dastan kahta hai huliya sar-ba-sar tera

kabhi rakh kar kisi zanu pe sar aaram bhi kar li

ghani hai chhanw kyun khulta nahin band kamar tera

charagh-e-arzu ki lau bhaDakne de abhi 'farhat'

wahi tanha shab-e-furqat mein hoga ham-safar tera