riwayat thi ye samjhauta nahin tha

rivāyat thī ye samjhautā nahīñ thā

maiñ sab kā thā koī merā nahīñ thā

hamesha is liye nā-ḳhush rahā maiñ

jo achchhā thā bahut achchhā nahīñ thā

mire hisse meñ aaya sabr kā phal

magar afsos vo mīThā nahīñ thā

kahānī zindagī kī muḳhtasar thī

alif-lailā kā afsāna nahīñ thā

usī aañsū pe thī ummīd qaa.em

jo us kī aañkh se chhalkā nahīñ thā

tavāzun kho chukī barsoñ se duniyā

jahāñ fir.aun thā muusā nahīñ thā

sazā ġhairoñ ke jurmoñ kī milegī

maiñ vo kāTūñgā jo boyā nahīñ thā

sar-e-rah lūTte haiñ chain rahzan

yahāñ aisā kabhī hotā nahīñ thā

diloñ ke rishte kaise TuuT jaate

ye do mulkoñ kā baTvārā nahīñ thā

musāvāt-e-haram allāhu-akbar

vahāñ koī baḌā chhoTā nahīñ thā

ḳhudāyā baḳhsh de merī ḳhatā.eñ

maiñ aksar hosh meñ rahtā nahīñ thā

riwayat thi ye samjhauta nahin tha

main sab ka tha koi mera nahin tha

hamesha is liye na-KHush raha main

jo achchha tha bahut achchha nahin tha

mere hisse mein aaya sabr ka phal

magar afsos wo miTha nahin tha

kahani zindagi ki muKHtasar thi

alif-laila ka afsana nahin tha

usi aansu pe thi ummid qaem

jo us ki aankh se chhalka nahin tha

tawazun kho chuki barson se duniya

jahan firaun tha musa nahin tha

saza ghairon ke jurmon ki milegi

main wo kaTunga jo boya nahin tha

sar-e-rah luTte hain chain rahzan

yahan aisa kabhi hota nahin tha

dilon ke rishte kaise TuT jate

ye do mulkon ka baTwara nahin tha

musawat-e-haram allahu-akbar

wahan koi baDa chhoTa nahin tha

KHudaya baKHsh de meri KHataen

main aksar hosh mein rahta nahin tha