riwayaton se bhare hashiye se bahar aa

rivāyatoñ se bhare hāshiye se bāhar aa

tilism toḌ ke tū dā.ere se bāhar aa

jamāl-e-yār kī jādūgarī se dāman jhaaḌ

nigāh-e-nāz ke har zāviye se bāhar aa

mujhe utārnā hai aks terā kāġhaz par

ḳhayāl-e-yār zarā hāfize se bāhar aa

maiñ Daal dūñgā tujhe ab jadīd sāñche meñ

radīf chhoḌ ke tū qāfiye se bāhar aa

nikāl koī nayā rāsta mohabbat kā

tū nafratoñ se bhare qāfiye se bāhar aa

ḳhudā ke vāste koī kahe ye 'sāgar' jī

firāq-o-hijr ke har sānahe se bāhar aa

riwayaton se bhare hashiye se bahar aa

tilism toD ke tu daere se bahar aa

jamal-e-yar ki jadugari se daman jhaD

nigah-e-naz ke har zawiye se bahar aa

mujhe utarna hai aks tera kaghaz par

KHayal-e-yar zara hafize se bahar aa

main Dal dunga tujhe ab jadid sanche mein

radif chhoD ke tu qafiye se bahar aa

nikal koi naya rasta mohabbat ka

tu nafraton se bhare qafiye se bahar aa

KHuda ke waste koi kahe ye 'sagar' ji

firaq-o-hijr ke har sanahe se bahar aa