rizq ki justuju mein kise thi KHabar tu bhi ho jaega raegan ya aKHi

rizq kī justujū meñ kise thī ḳhabar tū bhī ho jā.egā rā.egāñ yā aḳhī

terī āsūda-hālī kī ummīd par kar ga.e ham to apnā ziyāñ yā aḳhī

jab na thā ye bayābān-e-dīvār-o-dar jab na thī ye siyāhī bharī rahguzar

kaise karte the ham guftugū raat bhar kaise suntā thā ye āsmāñ yā aḳhī

jab ye ḳhvāhish kā amboh-e-vahshat na thā shahr itnā tahī-dast-e-fursat na thā

kitne ābād rahte the ahl-e-hunar har nazar thī yahāñ mehrbāñ yā aḳhī

ye giroh-e-asīrān-e-kizb-o-riyā bandagān-e-diram bandagān-e-anā

ham faqat ahl-e-dil ye faqat ahl-e-zar umr kaise kaTegī yahāñ yā aḳhī

ḳhud-kalāmī kā ye silsila ḳhatm kar gosh-o-āvāz kā fāsla ḳhatm kar

ik ḳhamoshī hai phailī huī sar-basar kuchh suḳhan chāhiye darmiyāñ yā aḳhī

jism kī ḳhvāhish se nikal kar chaleñ zāviya justujū kā badal kar chaleñ

DhūñDne āgahī kī koī rahguzar ruuh ke vāste sā.ebāñ yā aḳhī

haañ kahā thā ye ham ne bichhaḌte hue lauT ā.eñge ham umr Dhalte hue

ham ne sochā bhī thā vāpsī kā magar phir ye sochā ki tū ab kahāñ yā aḳhī

ḳhud-shanāsī ke lamhe baham kab hue ham jo the dar-haqīqat vo ham kab hue

terā ehsān ho tū batā de agar kuchh hameñ bhī hamārā nishāñ yā aḳhī

qissa-e-ranj-o-hasrat nahīñ muḳhtasar tujh ko kyā kyā batā.egī ye chashm-e-tar

ātish-e-ġham meñ jalte haiñ qalb-o-jigar aañkh tak aa rahā hai dhuāñ yā aḳhī

tū hameñ dekh aa kar sar-e-anjuman yuuñ samajh le ki haiñ jān-e-bazm-e-shuḳhan

ik to rūdād dilchasp hai is qadar aur us par hamārā bayāñ yā aḳhī

umr ke baab meñ ab ri.āyat kahāñ samt tabdīl karne kī mohlat kahāñ

dekh bād-e-fanā khaTkhaTātī hai dar ḳhatm hone ko hai dāstāñ yā aḳhī

ho chukā sab jo honā thā sūd-o-ziyāñ ab jo socheñ to kyā rah gayā hai yahāñ

aur kuchh fāsle kā ye raḳht-e-safar aur kuchh roz kā naqd-e-jāñ yā aḳhī

rizq ki justuju mein kise thi KHabar tu bhi ho jaega raegan ya aKHi

teri aasuda-haali ki ummid par kar gae hum to apna ziyan ya aKHi

jab na tha ye bayaban-e-diwar-o-dar jab na thi ye siyahi bhari rahguzar

kaise karte the hum guftugu raat bhar kaise sunta tha ye aasman ya aKHi

jab ye KHwahish ka amboh-e-wahshat na tha shahr itna tahi-dast-e-fursat na tha

kitne aabaad rahte the ahl-e-hunar har nazar thi yahan mehrban ya aKHi

ye giroh-e-asiran-e-kizb-o-riya bandagan-e-diram bandagan-e-ana

hum faqat ahl-e-dil ye faqat ahl-e-zar umr kaise kaTegi yahan ya aKHi

KHud-kalami ka ye silsila KHatm kar gosh-o-awaz ka fasla KHatm kar

ek KHamoshi hai phaili hui sar-basar kuchh suKHan chahiye darmiyan ya aKHi

jism ki KHwahish se nikal kar chalen zawiya justuju ka badal kar chalen

DhunDne aagahi ki koi rahguzar ruh ke waste saeban ya aKHi

han kaha tha ye hum ne bichhaDte hue lauT aaenge hum umr Dhalte hue

hum ne socha bhi tha wapsi ka magar phir ye socha ki tu ab kahan ya aKHi

KHud-shanasi ke lamhe baham kab hue hum jo the dar-haqiqat wo hum kab hue

tera ehsan ho tu bata de agar kuchh hamein bhi hamara nishan ya aKHi

qissa-e-ranj-o-hasrat nahin muKHtasar tujh ko kya kya bataegi ye chashm-e-tar

aatish-e-gham mein jalte hain qalb-o-jigar aankh tak aa raha hai dhuan ya aKHi

tu hamein dekh aa kar sar-e-anjuman yun samajh le ki hain jaan-e-bazm-e-shuKHan

ek to rudad dilchasp hai is qadar aur us par hamara bayan ya aKHi

umr ke bab mein ab riayat kahan samt tabdil karne ki mohlat kahan

dekh baad-e-fana khaTkhaTati hai dar KHatm hone ko hai dastan ya aKHi

ho chuka sab jo hona tha sud-o-ziyan ab jo sochen to kya rah gaya hai yahan

aur kuchh fasle ka ye raKHt-e-safar aur kuchh roz ka naqd-e-jaan ya aKHi